A obra Adosados 3 representa un edificio de 12 pisos con catro vivendas por planta, radicado nunha avenida e que comparte cos edificios laterais o patio de luces.

O tipo de edificio elixido pode ser un exemplo dos moitos que pechan rúas e se adosan uns aos outros. Pese a esta xeneralidade, a elección do modelo débese a que eu vivín neste edificio, no 3ºC do nº 154 da Avenida das Fontiñas en Lugo, ao longo de tres anos. Puiden ter elixido un modelo que fora representativo deste tipo de construción, pero o meu interese centrábase ademais en descubrir o seu interior. A través deste edificio que coñezo, e que serviu de referencia para moitas das miñas obras, podo contar as miñas experiencias e as dos demais. Unha lembranza especial da veciña de enfronte, a ruxida dos veciños de arriba, a TV dos do lado; todos durmindo.

Adosados 3 é quizais a culminación do meu traballo nos últimos anos. A posibilidade de proxectar un edificio, despois de crear tantos cuartos illados. O gran proxecto ao que finalmente un debe enfrontarse. Adosados 3 concentra coñecementos desenvolvidos nas series construíndo o descanso, asepsia, adosados.

A cama, un total de 27 (13 de cor branca e 14 de diferentes cores), é o moble a través do que se descubre o interior do edificio. Repetidas en cada un dos andares parten do primeiro andar no que aparecen todas, para elevarse, suspendidas por goma elástica, a cada un dos restantes niveis, unha cama en cada andar. A medida e colocación destas camas nos dormitorios responden a distintas combinacións, nas que, superficie, cama, porta e fiestra dialogan, sempre buscando e cuestionando o descanso.

As gomas que suspenden estas camas teñen un lugar de confluencia, o nivel sinalado como X sirve, na parte superior e inferior do edificio, para suxeitar as gomas. Este espazo representa os falsos teitos e os lugares ocultos das casas. Aparecen tamén representados os garaxes, como o nivel –1, a entrada como 0, +1 para os trasteiros, +2 para o ceo e o teito, e 12 plantas de vivendas. En cada un destes niveis rotúlase a planta correspondente, ascensor, escaleiras, tabiques, cuartos, fiestras, etc. Esta rotulación faise nunha ampla gama de cores –laranxa para os tabiques, vermello para as zonas comúns, azul para as fiestras, gris para os patios, etc.- sobre un fondo branco.

Mónica Alonso, 1997